Карысны праект прыдумалі ў цэнтры творчасці дзяцей і моладзі. Тут у бягучым годзе распачаў работу гурток “Маладзічок”, якім кіруе настаўнік беларускай мовы і літаратуры вышэйшай катэгорыі Людвіка Таўгень. Людвіка Станіславаўна, набраўшы вучняў пачатковых класаў у гімназіі № 1 г. Валожына, з дапамогай супрацоўнікаў раённага музея паглыбляе юных валожынцаў у беларускую этнаграфію і фальклор.
Выкарыстоўваючы гульнёвыя тэхналогіі, розныя віктарыны і тэсты, відэаматэрыялы, экспазіцыю ўстановы культуры, дарослыя дапамаюць дзецям запамінаць беларускія словы, вывучаць побыт, традыцыі і абрады. Сама кіраўнік гуртка, таксама як дырэктар музея Наталля Лоўчая і навуковы супрацоўнік Таццяна Васільева, з натхненнем дзеляцца з хлопчыкамі і дзяўчынкамі сваімі ведамі. Больш за ўсё любяць няўрымслівыя наведвальнікі самы ўтульны куток установы – сялянскую хатку. Вось дзе прастора для вывучэння вясковай лексікі. Высветлілася, што многія словы, якія зараз, асабліва ў горадзе, можна пачуць даволі рэдка, дзеці добра ведаюць. Як і назвы прылад працы, што даўно перасталі быць актуальнымі, такія, як пранік і качалка, калаўрот і верацяно, качарга і вілы…
Мы пазнаёміліся з удзельнікамі “Маладзічка” менавіта ў час заняткаў у музеі. Спачатку аматары-беларусазнаўцы, размясціўшыся на дыване перад тэлевізарам, назіралі за героямі відэафільма пра развіццё івянецкай керамікі. Тэму ганчарства закранаў і анімацыйны фільм, які выклікаў мноства станоўчых эмоцый у дзетвары, даў магчымасць прадэманстраваць сваю назіральнасць падчас адказаў на пытанні дарослых. Спадабаўся дзецям і момант, калі ім прадаставілі магчымасць пазнаёміцца з вынікам працы рамеснікаў – глінянымі птушкамі-свістулькамі.
У інтэр’еры сялінскай хаты гурткоўцы разгледзелі працэс прыгатавання хлеба, пасля чаго з музейнай цуда-печы настаўніца дастала апетытны пачастунак – духмяны бохан. Назіраць за хлопчыкамі і дзяўчынкамі, якія радаваліся няхітраму сюрпрызу, было надзвычай цікава. Яшчэ больш яркую іх рэакцыю выклікаў так званы зайчыкаў хлеб. Вось што значыць сувязь пакаленняў – сучасныя дзеці, таксама як і прадстаўнікі старэйшага пакалення, добра ведаюць што гэта такое. Самыя актыўныя нават выдалі некалькі версій пра паходжанне назвы незвычайнага пачастунка.
Валянціна КРАЎНЕВІЧ,
фота аўтара
