У Валожыне адбылася галоўна ёлка раёна. Чароўнае свята з хвойным водарам прайшло ў адноўленай зале РЦК. Сюды з розных куткоў Валожыншчыны з’ехаліся пераможцы прадметных алімпіяд, навуковых канферэнцый, творчых конкурсаў і фестываляў, якія сваімі здольнасцямі здабываюць славу і гонар установам адукацыі і раёну ў цэлым.
Удзельнікаў свята асабіста вітаў старшыня райвыканкама Яўгеній Круковіч. Яўгеній Міхайлавіч павіншаваў хлопчыкаў і дзяўчынак, пажадаў шчасця і здароўя, веры ў свае сілы і імкнення да поспеху. Кіраўнік раённай улады ўзгадаў, што кожны чалавек – родам з дзяцінства, таму нават дарослым зразумела радаснае адчуванне надыходзячага Новага года, а для дзетвары любога пакалення гэта свята і ўвесь перыяд, што папярэднічае яму, застаюцца самымі любімымі момантамі жыцця.
Работнікі культуры і адукацыі зрабілі прадстаўленне па матывах казкі “Брэменскія музыканты” цікавым і зразумелым кожнаму гледачу, незважаючы на ўзрост. Напрыканцы насычанага падзеямі, музыкальнымі нумарамі і гульнёвымі момантамі мерапрыемства Дзед Мароз і Снягурка са сваімі памочнікамі раздалі дзетвары падарункі ад раённага выканаўчага камітэта. Прыгожы куфэрак з салодкім напаўненнем дастаўся кожнаму.
Вучаніца 9 класа СШ №1 г. Валожына Лізавета СУЧКЕВІЧ:
– Я не аднойчы абараняла гонар школы на раённай алімпіядзе па фізічнай культуры, бо ўсё сваё жыццё займаюся спортам. Вельмі радавалася запрашэнню на гэта свята. Яно сапраўды шыкоўнае.
Вучаніца 3 класа Ракаўскай школы Ксенія ЯРМАКОВІЧ
– Мне падабаецца ўдзельнічаць у анлайн-акцыях патрыятычнага кірунку. Відаць таму мяне ўключылі ў спіс удзельнікаў галоўнай ёлкі. Я шчаслівая, бо тут так цікава! З радасцю дасылаю прывітанне маёй любімай, дарэчы, шматдзетнай сям’і.
Вучань 3 класа СШ № 2 г. Валожына Аляксей БОЛВАХ:
– Такога прадстаўлення я яшчэ не бачы! Усе героі – сапраўдныя артысты, быццам з тэлевізара. А якая прыгожая сцэна! Люблю Новы год. Віншую з гэтым святам усіх дзяцей. Няхай кожнаму Дзед Мароз прынясе жаданы падарунак.
Вучні гімназіі № 1 г. Валожына 4-класніца Варвара ТРУС і 5-класнік Мацвей Радзівілка:
– Сёння нам выпаў гонар павітаць старшыню райвыканкама, падзякаваць за віншаванне і ўручыць памятны падарунак. Радуемся, што не разгубіліся. Усё, што ўбачылі, у чым паўдзельнічалі, уразіла. Асабліва вадкакрысталічны экран на сцэне, з дапамогай якога стваралася ілюзія прысутнасці дэкарацый падчас прадстаўлення.
Вучаніца 10 класа СШ№ 1 г. Валожына Настасся Ракавец:
– Я хутка стану выпускніцай. Аднак навагодняе свята мне спадабалася. Арганізатары зрабілі так, што і першакласнікам, і вучням старэйшых класаў было весела і цікава. Сама я – актыўная ўдзельніца розных мерапрыемстваў як у школе, так і на ўзроўні раёна, таму смела магу сказаць: сённяшняе відовішча – адно з лепшых. Сцэнарый, гук, ігра выканаўцаў роляў, іх касцюмы, сама атмасфера літаральна зачаравалі.
Валянціна КРАЎНЕВІЧ,
фота аўтара
