Жыхар вёскі Сазонаўшчына Аляксандр ЯРМАК сёння, 1 сакавіка, адзначыў 102-і Дзень нараджэння. Аляксандр Аляксандравіч – удзельнік Вялікай Айчыннай вайны. Служыў са снежня 1944 года па май 1945 года. Прымаў удзел у вызваленні Варшавы, Познані, Берліна. Узнагароджаны медалямі “За адвагу”, “За ўзяцце Берліна”, “За перамогу над Германіяй”, ордэнам Айчыннай вайны 2-й ступені.
На шчасце, нягледзячы на салідны ўзрост, А. А. Ярмак па-ранейшаму ў страі. Амаль шэсць гадоў з-за складанага захворвання вачэй нічога не бачыць, аднак рухаецца самастойна, а памяці і мысленню чалавека, які перасягнуў стагадовы ўзрост, могуць пазайздросціць нават маладыя.
Павіншаваць паважанага чалавека прыехалі старшыня раённага Савета дэпутатаў Пётр БІБІК і начальнік упраўлення па працы, занятасці і сацыяльнай абароне райвыканкама Святлана РАКАВЕЦ, старшыня Дорскага сельвыканкама Рамуальда ІВАНОЎСКАЯ.
Пётр Іосіфавіч, Святлана Леанідаўна і Рамуальда Браніславаўна пажадалі ветэрану здароўя, бадзёрасці і ўручылі яму падарунакі. Аляксандр Аляксандравіч у сваю чаргу папрасіў перадаць удзячнасць за ўвагу кіраўніцтву раёна, а таксама пажаданне міра і дабра ўсім жыхарам Валожыншчыны.
Валянціна КРАЎНЕВІЧ,
фота аўтара
