На пярэдадні падчас урачыстасці ва ўпраўленні бытавога абслугоўвання Мінаблвыканкама за высокі прафесіяналізм і шматгадовую шчырую адданасць інтарэсам прадпрыемства нагрудным знакам “Выдатнік бытавога абслугоўвання” адзначана цырульнік жаночай залы Святлана КЕРБЕДЗЬ.
Па меркаванні самога спецыяліста, яе прафесія бадай самая некансерватыўная ў свеце. Раз і назаўсёды навучыцца аказваць паслугі цырульніка і пасля назаўсёды забыць аб неабходнасці расці і развівацца ў гэтай творчай справе, немагчыма. Тэндэнцыі на формы стрыжак, прычосак і на методыкі іх выканання мяняюцца з хуткасцю света. Не гаворачы ўжо пра тэхналогіі фарбавання. Таму крэда любога запатрабаванага спецыяліста ў гэтай галіне – толькі наперад.
Цікава, што ў прафесію яна трапіла выпадкова, аднак, хоць мае дыплом бухгалтара, прысвяціла ёй жыццё. З удзячнасцю ўспамінае свайго настаўніка і сяброўку Галіну Галоўскую, ад якой пераймала як уменне непасрэдна працаваць з валасамі, так і дыпламатычныя прыёмы ў зносінах з самымі рознымі кліентамі. Яна гатова наладзіць кантакт і з тым, хто дакладна ведае, чаго жадае, і з тым, хто, апускаючыся ў крэсла, гаворыць з надзеяй: “На Ваш густ”.
Калі Святлану Яўгеньеўну пытаюць, як не памыліцца з выбарам майстра, яна заўсёды прапаноўвае глянуць, што ў таго на галаве, бо знакаміты “сапожник без сапог” наўрад ці можа падарыць камусьці радасць ад сваёй працы, раз не дорыць яе сабе. І яшчэ на адзін нюанс раіць звяртаць увагу спецыяліст, які выглядае настолькі молада, што цяжка паверыць у шматгадовы вопыт, – мы мяняемся з узростам, таму, каб гэта не падкрэсліваць, лепш за ўсё перыядычна прымяраць на сябе розныя іміджы. Святлана Яўгеньеўна шчыра віншуе з юбілеем РКБА сваіх калег і кліентаў. Кожнаму зычыць здароўя, радасці і (што значыць, прафесіянал!) зацікаўленасці ў доглядзе за сабой.
З мэтай захавання і развіцця традыцый у сферы бытавога абслугоўвання насельніцтва ў Рэспубліцы Беларусь, ушанавання работнікаў арганізацый сферы за ўклад у яе ўдасканаленне Указам Прэзідэнта Рэспублікі Беларусь зацверджаны знак “Выдатнік бытавога абслугоўвання”.
Нагрудным знакам за значны асабісты ўклад у развіццё сферы бытавога абслугоўвання, узорнае выкананне сваіх абавязкаў, дасягненне высокіх паказчыкаў у працы ўзнагароджваюцца работнікі Міністэрства гандлю, структурных падраздзяленняў мясцовых выканаўчых органаў, якія ажыццяўляюць дзяржаўна-ўладныя паўнамоцтвы ў сферы бытавога абслугоўвання насельніцтва, арганізацый бытавога абслугоўвання насельніцтва, індывідуальныя прадпрымальнікі, што аказваюць паслугі насельніцтву, адпрацаваўшыя ў галіне не менш за 10 гадоў.
