Па стане на 26 мая да касавіцы ў раёне прыступілі дзве гаспадаркі. У КСУП “Пяршаі-2014” механізатары правялі першае “зялёнае жніво” на 16 гектарах. Работнікі СГУ “Бабровічы” УП “Мінскаблгаз” ахапілі працай 42 гектары шматгадовых траў.
Нарыхтоўкай кармоў у бабровіцкім сельгаспрадпрыемстве займаюцца гэтымі днямі механізатары Валерый Уладзіміравіч Зянько і Віктар Мікалаевіч Маразянкоў. Першы працуе на энерганасычаным “МТЗ-1523” у агрэгаце з прэс-падборшчыкам, другі – на “МТЗ-922” з ротарнымі граблямі-падрушвальнікамі. Дзякуючы зладжанай рабоце прафесіяналаў, за першыя дні касьбы кармавая база гаспадаркі папоўнілася на 46 тон сенажу.
Валерый Уладзіміравіч – адзін з прызнаных лідараў сярод механізатараў СГУ “Бабровічы” УП “Мінскаблгаз”. Ён шчыруе на палетках прадпрыемства больш за два дзесяцігоддзі, аднолькава дасканала ў яго атрымліваецца і глебу заараць, і пасеяць, і пакасіць… Стараецца не адставаць ад рупліўца і яго калега Віктар Мікалаевіч. У калектыве ён першы год, аднак вопыту ў механізатарскай справе таксама не займаць.
Сяргей САДОЎСКІ
Фота Сяргея БОБРЫКА
