Уборка-2017 яшчэ не набрала поўную сілу, а зернесушыльны комплекс КСУП “Пяршаі-2014” працуе амаль бесперапынна. Запусцілі сушыльную печ два тыдні назад. У дзень высушваецца да 120 тон. За гэты час спарадкавана 500 тон насення азімага рапсу. З улікам работы сушылкі ў Манькавічах высушана 638 тон гэтай культуры. За першы дзень уборкі азімага трыцікале на комплекс паступіла 115 тон зерня.
Аператару Валянціну Зігмундавічу ХАЛЕВІЧУ і яго памочніку Юрыю Уладзіміравічу ЗАГОРСКАМУ дапамагаюць навучэнцы сельскагаспадарчага прафесійнага ліцэя, якія ў складзе студатрада накіраваны ў гаспадарку. Пачалі часовую працоўную дзейнасць юнакі на полі, дзе растуць цукровыя буракі. Некалькі дзён займаліся праполкай. Зараз першакурснік Яўген РУБАЦКІ і другакурснік Павел КАЗАК прыступілі да работы на комплексе. Абавязкі не складаныя: падграбаць, падмятаць, увогуле сачыць за парадкам. Як адзначыла намеснік камандзіра атрада Алена Міхайлаўна Бубневіч, падганяць хлопцаў няма патрэбы: кожны спадзяецца за час працоўнага семестра зарабіць грошы. Супрацоўнікі сельгаспрадпрыемства з удзячнасцю прымаюць дапамогу моладзі.
