Кліп "Вёска" за два дні сабраў амаль 38 тысяч праглядаў на "Ютубе".
Твор гурта "Дразды" нават і кліпам называць не хочацца. Бо гэта хутчэй відэахроніка тых мясцін, дзе прайшло дзяцінства ледзьве не кожнага з нас.
Ну хто з нас не трывожыў спакой мясцовых бабулек рыкам матацыклаў "Мінск" і "Планета", хто не бег басанож, падымаючы пыл, да возера?
Хто не любаваўся на буслоў і на тое, як спее жыта? Хто не рваў яшчэ зялёныя яблыкі ў садзе? Асабліва, калі гэты сад суседскі?
Пяшчотай і замілаваннем беларускай вёскай прасякнуты ўвесь кліп "Драздоў".
Віталь Карпанаў, саліст гурта, расказаў "Рэгіянальнай газеце", што кліп, магчыма, таму і атрымаўся такім шчырым, бо здымалі яго ў вёсцы бацькоў Віталя, у вёсцы Сівіца, што на Валожыншчыне.
У кліпе ўсё сапраўднае: дзеці, што здымаліся ў кліпе, усе мясцовыя, матацыклы, што здымаліся ў кліпе, належаць самаму Віталю.
- Я часта бываю ў вёсцы, разы два на месяц дакладна. І ўсё тое, што паказана ў кліпе, раблю з задавальненнем: і ў возера нырца даю, і сала люблю на вогнішчы пажарыць.
У кліпе зняўся чатырохгадовы сын Віталя Карпанава.
- Сыну здымкі спадабаліся. Ён у нас хлопец вясковы!
Таму, калі захочаце адпачнуць душой, хаця б чатыры хвілінкі, уключыце кліп і падпявайце:"Вёска, вёска, вёска, у полі жыта нібы прычоска"...
http://www.rh.by
