75-годдзю ўтварэння Валожынскага раёна прысвяцілі сваё першае ў новым годзе мерапрыемства ўдзельнікі народнага літаратурна-мастацкага аб’яднання “Рунь” Валожынскага РЦК. У гасцёўню “Руні” былі запрошаны людзі, якія ўсё сваё свядомае жыццё шчыравалі на карысць любай Валожыншчыны. Напачатку мерапрыемства рунеўцаў і іх гасцей вітаў начальнік аддзела ідэалагічнай работы, культуры і па справах моладзі Валожынскага райвыканкама Вікенцій Мікалаевіч Адамовіч. Шчырыя, сардэчныя словы падзякі адрасаваў ён валожынскім творцам, як членам Саюза пісьменнікаў Беларусі ( а іх у нас 4), так і ўсім рунеўцам, чыё літаратурнае слова асвятляе душы, вучыць юных валожынцаў любіць свой родны кут, сваю Радзіму, ведаць і шанаваць садчыну.
Успамінамі аб самых цікавых, адметных момантах і падзеях за час працы ў рэдакцыі раённай газеты “Працоўная слава” і ў райкаме партыі падзялілася былы рэдактар раёнкі С.І.Кавяза. Было што ўспомніць-расказаць С.С.Маляўскаму, які нарадзіся тут, на Валожыншчыне і аддаў роднаму раёну ўсю сваю любоў і вернасць. Годна і сумленна служыў яму, працуючы на самых высокіх у раёне пасадах (старшыня райвыканкама, кіраўнік заканадаўчай улады. Дарылі сябрам па пяру і гасцям свае вершаваныя творы і іншыя ўдзельнікі аб’яднання. А Станіслаў Пупко выканаў дзве ўласныя песні, прысвечаныя любай Валожыншчыне, адна з якіх прагучала ўпершыню.
Так па-сяброўску, па-роднаму цёпла і сардэчна, за кубачкам гарбаты і салодкімі пачастункамі, ішла гутарка аб роднай зямлі, спадчынных каранях, набытках і слаўных працаўніках раёна-юбіляра, аб творчых планах і задумах аб’яднання і яго ўдзельнікаў. А двое з іх, Марыя Шакун і Людміла Садоўская, якія нарадзіліся ў адметныя, асвечаныя Каляднай зоркай дні студзеня, разам са шчырымі віншавальнымі словамі сяброў атрымалі памятныя сувеніры-падарункі.
Валянціна Гіруць-Русакевіч,
кіраўнік народнага літаратурна-
мастацкага аб’яднання “Рунь” .
