«Паэт-самавук з Валожына» – так называлася літаратурна-пазнавальная сустрэча да 160-годдзя з дня нараджэння збіральніка фальклору, паэта і публіцыста Старога Уласа (Уладзіслава Пятровіча Сівога-Сівіцкага), якую ўдзельнікі народнага калектыву літаратурна-мастацкага майстэрства «Рунь» Валожынскага РЦК падрыхтавалі сумесна з навучэнцамі СШ №2 г.Валожына і правялі 9 красавіка. У ўтульную залу раённага цэнтра культуры завіталі дзеці з розных навучальных устаноў райцэнтра, якіх арганізатары мерапрыемства пазнаёмілі з жыццём і творчасцю свайго земляка. Былі зачытаны ўспаміны дачкі Старога Уласа Гелены Сівіцкай пра бацьку. А яго жыццёва-мудрыя творы пранікнёна чыталі ( асобныя і па ролях) прыхільнікі беларускай мовы і літаратуры з другой школы. На сустрэчы ўдзельніца творчай суполкі Валожыншчыны Марыя Мучынская прачытала верш, прысвечны слаўнаму земляку. У пасля ўсе разам пайшлі да дома № 49 па вуліцы Савецкай райцэнтра, які, дарэчы будаваў сам У.П.Сівы-Сівіцкі для сына і ўсклалі кветкі да памятнай шыльды, аддаўшы даніну павагі і пашаны слаўнаму земляку-творцу.
