У Валожынскім раёне завяршыўся другі этап акцыі “У цэнтры ўвагі - дзеці!”. Работнікі раённага аддзела па надзвычайных сітуацыях наведалі ўстановы адукацыі, каб правесці ўрокі бяспекі, мэтай якіх з’яўляецца фарміраванне навыкаў самазахавання. Хочацца адзначыць, што ўсе дзеці актыўна выконвалі заданні, прапанаваныя ратавальнікамі, а таксама задавалі свае не менш цікавыя пытанні. Дзяўчынкі і хлопчыкі дзяліліся рознымі сітуацыямі, якія адбываліся з імі гэтым летам і дружна абмяркоўвалі, чаму гэта адбылося, і як можна было пазбегнуць надзвычайнай сітуацыі. Вучням было прапанавана праглядзець навучальны мультфільм, а таксама адказаць на пытанні віктарыны. У завяршэнні кожнага занятка дзецям былі ўручаны памяткі і цікавыя кніжкі. Урокі бяспекі прайшлі цікава і пазнавальна. Дзеці змаглі ўспомніць усё, што ведалі аб правілах бяспекі і даведаліся шмат новага.
Прайшлі ў навучальных установах і бацькоўскія сходы, на якіх ратавальнікі звярнулі ўвагу бацькоў на неабходнасць размаўляць са сваімі дзецьмі аб правілах бяспекі, тлумачыць ім, якая небяспека іх можа чакаць, калі яны не будуць іх выконваць.
