Воложинский районный
исполнительный комитет

У рамках праекта “Садзейнічанне развіццю на мясцовым узроўні ў Рэспубліцы Беларусь” Валожынскім сельвыканкамам рэалізуецца ініцыятыва “Птушка ў аб’ектыве”, якая карыстаецца падтрымкай ПРААН і фінансуецца Еўрапейскім Саюзам.

З цікавай ідэяй выступіў гаспадар аграсядзібы “За масточкам” Дзмітрый Віктаравіч Наканечны. Ён жа з’яўляецца адным з сацыяльных партнёраў праекта і мае паўнамоцтвы каардынатара. Актыўны ўдзел у ажыццяўленні цікавай задумы прымаюць ДУА “Сакаўшчынскі вучэбна-педагагічны комплекс дзіцячы сад-сярэдняя школа імя В. А. Каваленкі” і ДУ “Валожынскі тэрытарыяльны цэнтр сацыяльнага абслугоўвання насельніцтва”. У свой час гэта ініцыятыва была выбрана першай са 126 на конкурснай аснове і атрымала грант у памеры 12418 еўра.

Нядаўна на базе аддзялення дзённага знаходжання для інвалідаў ТЦСАН адбыўся семінар “Бёрдвотчынг – новы від экалагічнага турызму”. На сустрэчу запрасілі наведвальнікаў аддзяленняў дзённага знаходжання для грамадзян пажылога ўзросту і для маладых інвалідаў, супрацоўнікаў цэнтра. Была сфарміравана экспертная група, кожны прадстаўнік якой даводзіў да ўдзельнікаў інфармацыю па сваім профілі.

І. В. Кавяза – загадчык аддзялення дзённага знаходжання для людзей пажылога ўзросту ТЦСАН – падрыхтавала для сваіх падапечных папулярную інфармацыю аб стане развіцця аграэкатурызму ў рэспубліцы і, у прыватнасці, на Валожыншчыне. Раён у азначаным кірунку займае лідзіруючую пазіцыю ў вобласці. Гаспадары аграсядзіб прапаноўваюць свае крэатыўныя прадукты. У бягучым годзе іх паслугамі скарысталіся больш за 15000 чалавек, з іх 2000 – госці з замежжа. Адметнасць валожынскіх сядзіб у тым, што кожная з іх можа задаволіць патрэбы турыстаў з розным узроўнем даходаў. Вялікая ўвага надаецца стварэнню безбар’ернага асяроддзя для адпачываючых з абмежаванымі магчымасцямі, пажылых людзей.

Дзмітрый Наканечны выступіў са справаздачай аб рэалізацыі запланаваных мерапрыемстваў. У належны тэрмін многія пункты, прапісаныя ў праекце, выкананы. Сумесна са школьнікамі, настаўнікамі, супрацоўнікамі і наведвальнікамі аддзяленняў ТЦСАН была падрыхтавана пляцоўка для будаўніцтва назіральнай альтанкі. Збудаванне ўзведзена па спецыяльным праекце, які прадугледжвае ўсё неабходнае для назірання за птушкамі. Рознаўзроўневы падаконнік дазволіць любавацца наваколлем людзям любога росту. Прадугледжаны таксама прыборы: біноклі, фота- і відэакамеры, камп’ютар.

Віталь Валер’евіч Сафон – кандыдат біялагічных навук, дацэнт (выконваючы абавязкі загадчыка) кафедры заалогіі біялагічнага факультэта БДУ – не першы раз выступае экспертам падчас рэалізацыі падобных ініцыятыў. Спецыяліст пазнаёміў зацікаўленых асоб з перавагамі новага даступнага для кожнага жадаючага віду экалагічнага турызму. Бёрдвотчынг – гэта модны, прыгожы і карысны занятак. Еўрапейскае грамадства даўно ацаніла такі спосаб яднання з прыродай. Найбольш папулярны ён у тых, хто сёння знаходзіцца на заслужаным адпачынку.

Як адзначыў старшыня Валожынскага сельвыканкама Дзмітрый Казіміравіч Карачун, раённыя ўлады гатовыя аказваць усебаковую падтрымку любым сацыяльна значным праектам, асабліва тым, якія будуць спрыяць рэалізацыі творчых памкненняў людзей паважанага ўзросту і людзей з інваліднасцю.  

У бліжэйшых планах суполкі аднадумцаў – цікавыя мерапрыемствы і далейшае ўдасканаленне сумесна ўзведзенай базы для назірання за птушкамі.

Валянціна КРАЎНЕВІЧ,

фота аўтара

Падарункі і падзякі ад прафсаюза работнікаў аграпрамысловага комплексу з рук старшыні раённага камітэта Віктара Станіслававіча ГІДЛЕЎСКАГА атрымалі лепшыя працаўнікі КСУП “Падбярэззе”.

Аляксандр Леанідавіч МАКАРЭВІЧ упершыню прымае ўдзел у жніве. У гэтым годзе ён скончыў Мінскі каледж сучасных тэхналогій і машынабудавання, дзе набыў адразу дзве спецыяльнасці: “Механік 5-га разраду” і “Вадзіцель катэгорыі “С”. На аўтамабілі МАЗ малады чалавек перавёз каля 1300 тон зерня.

Віктар Станіслававіч ТАМАШЭВІЧ – увогуле лічыцца ў гаспадарцы незаменным падчас уборачных кампаній. На трактары “Беларус-82” займаецца прэсаваннем саломы. Вынік яго работы, як заўсёды, бездакорны. Вопытны механізатар не першы раз адзначаецца ўзнагародамі за выдатныя паказчыкі.

Валянціна КРАЎНЕВІЧ,

фота аўтара

“Хто прыдумаў самагонку – каб таму скула і плех…”

Вусная народная творчасць

Узмоцненая барацьба з самагонаварэннем у нашым раёне вядзецца ўжо не адзін год. Вынік ёсць. Напрыклад, мінулі часы, калі ледзь не ў кожным доме гналася гарэлка, у лясах чадзілі шматлікія “гажэльні”, працвітаў як оптавы, так і рознічны самагонны гандаль, а Валожыншчына мела славу гарэлачнай сталіцы. Цяпер гаварыць аб самагонаварэнні як масавай з’яве нельга. Аднак цалкам вытравіць гэту бяду ўсё яшчэ не ўдаецца.  

За апошнія месяцы да адміністрацыйнай адказнасці за незаконны абарот алкагольнай прадукцыі прыцягнуты 68 чалавек, некаторыя з іх – паўторна. Заканадаўства дазваляе прымяняць да такіх правапарушальнікаў жорсткія меры: штраф у памеры да 30 базавых велічынь. Супрацоўнікамі міліцыі сёлета выяўлены 9 самагонных апаратаў, канфіскаваны і знішчаны 3460 літраў брагі і 556 літраў высакаградуснай прадукцыі.

Пастаянна, згодна з распрацаваным графікам, участковыя інспектары міліцыі праводзяць праверкі на сваіх адміністрацыйных участках з мэтай выкаранення п’янства, незаконнага вырабу і збыту алкаголю. Не застаюцца ўбаку ад гэтай праблемы і супрацоўнікі іншых аддзелаў РАУС.

Нядаўна прадстаўнік службы ДАІ спыніў у вёсцы Доры легкавую машыну, якой кіраваў жыхар Маладзечна. Пры аглядзе аўтамабіля міліцыянер заўважыў ёмістасці з вадкасцю. З іх даносіўся характэрны пах. Як будзе ўстаноўлена пазней, мужчына ў той раз перавозіў 500 літраў брагі.

Затрыманы аказаўся вядомым на Маладзечаншчыне самагоншчыкам. Ён неаднаразова прыцягваўся да адміністрацыйнай адказнасці, але развітвацца з крымінальным “бізнесам” не жадаў. Паколькі ў сваім раёне ён знаходзіўся пад шчыльным “каўпаком” у міліцыі, то рашыў перавезці вытворчасць у іншае месца. Відаць, спадзяваўся, што пазбегне кантролю, і такім чынам яго справа не толькі раскруціцца, але і выйдзе на новы, больш магутны віток.

У Шараях жыла пажылая цётка самагоншчыка. На падворку ў сваячкі стаялі гаспадарчыя пабудовы, дзе якраз і можна размясціць “цэх” са змеявіком, прыхаваць бочкі з гатовай прадукцыяй. Доўга ўгаворваць пажылую жанчыну не прыйшлося: паабяцаў нядрэнную прыбаўку да пенсіі, яна і паквапілася. Але план па абагачэнні не спрацаваў. Нават наадварот адбылося. За выраб і захоўванне самагону ў адносінах да жанчыны склалі пратакол аб адміністрацыйным правапарушэнні і пакаралі штрафам у памеры 230 рублёў.

Алена ЗБІРЭНКА

Фота прадастаўлена РАУС

Постановлением Министерства здравоохранения Республики Беларусь от 24 июля 2017 года внесены изменения и дополнения в Санитарные нормы и правила «Требования к учреждениям дополнительного образования детей и молодежи, специализированным учебно-спортивным учреждения», утвержденные постановлением Министерства здравоохранения Республики Беларусь от 4 июня 2013 года № 43.

Текст вышеуказанного постановления размещен на интернет-сайте Министерства здравоохранения Республики Беларусь minzdrav.gov.by в разделе База правовых актов.

В рамках велопробега в поддержку Целей устойчивого развития Bike4SDGs 2017, который пройдет 26.08.2017г. – 03.09.2017г. в г.Гродно, г.Минске, Гродненской и Минской области, 01.09.2017 г. в кинотеатре «Юность» г.Воложина в 13.00 состоится демонстрация фильма Иранского производства «Нарисованная заводь». Вход свободный.

Четвертая акция «Твае першыя фінансы» стартует в Минской области в сентябре 2017 года и будет проводится на протяжении трех месяцев. За это время все учащиеся пятых классов общеобразовательных школ и иных учебных заведений области получат сборники «Твае першыя фінансы». Торжественные мероприятия, приуроченные данному событию, состоятся во всех районный центрах Минской области.
Подробности по ссылке ( http://www.belapb.by/rus/about/finansovaya-gramotnost/detskaya-finansovaya-gramotnost/ ).

Начальнікам раённай інспекцыі прыродных рэсурсаў і аховы навакольнага асяроддзя В. Р. Якутовічам сёлета складзены пратаколы ў адносінах да 17 грамадзян, якія кідалі смецце там, дзе гэта забаронена.

Згодна з часткай 2 артыкула 15.63 Кодэкса аб адміністрацыйных правапарушэннях Рэспублікі Беларусь, яны пакараны штрафамі ў памеры ад 5 да 20 базавых велічынь. У хуткім часе рады штрафнікоў папоўняцца: ДЛГУ “Валожынскі лясгас” выявіў членаў садовага таварыства “Заходняя Бярэзіна” ў ваколіцах вёскі Кражына, што засмечваюць лес.

Ужо не першы год лясгасаўцы выстаўляюць у лясных масівах відэапасткі і “ловяць” тых, хто неналежным чынам сябе там паводзіць. Пасля апошняга прагляду запісаў відэакамеры ў многіх быў сапраўдны шок: смецце кідаюць нават людзі станоўчыя, вядомыя ў горадзе і раёне. Свае ўчасткі яны падтрымліваюць у парадку, а вось усё лішняе, непатрэбнае нясуць у лес.

Як паведамілі ў РУП “Валожынскі жылкамунгас”, смецце з таварыства каля Кражына вывозіцца па суботах, двойчы на месяц. Такі графік быў прапанаваны самімі дачнікамі. Старшыня СТ “Заходняя Бярэзіна” У. У. Гулевіч расказаў, што раней машыны па зборы адходаў прыязджалі кожны тыдзень і на гэту камунальную паслугу даводзілася траціць значную суму грошай. З мэтай эканоміі колькасць рэйсаў зменшылі ўдвая. Нават пры такім раскладзе можна забяспечыць чысціню навакольных лясоў. Проста трэба заставацца цывілізаваным чалавекам і паводзіць сябе адпаведна. 

Але выхаванне – працэс далёка не імгненны, а шкода лесу наносіцца цяпер. Магчыма, праблема вырашылася б з устаноўкай кантэйнераў для збору смецця. Аднак каштуюць яны нятанна, пры іх эксплуатацыі павінны выконвацца пэўныя санітарныя нарматывы, што забяспечыць уласнымі сіламі дачнікі не могуць. 

Вось і застаецца толькі адзін метад барацьбы з правапарушальнікамі: лавіць і караць рублём. А на штраф грошы абавязкова знойдуцца…

Алена ЗБІРЭНКА

Фота прадастаўлена

ДЛГУ “Валожынскі лясгас”

На мінулым тыдні наш раён наведаў кіраўнік Цэнтра палітычнай і эканамічнай сацыялогіі Інстытута сацыялогіі НАН Беларусі, кандыдат філасофскіх навук, дацэнт, аўтар больш чым 100 навуковых работ Мікалай Шчокін. Напачатку ён сустрэўся са старшынёй раённага выканаўчага камітэта Мікалаем Астрэйкам, а затым скарыстаўся магчымасцю выступіць перад ідэалагічным актывам Валожыншчыны падчас Адзінага дня інфармавання насельніцтва з лекцыяй-разважаннем на тэму ролі кожнага чалавека-грамадзяніна ў фарміраванні навейшай гісторыі краіны.

    Мікалай Сяргеевіч у райцэнтры быў упершыню, і яму спадабаліся чысціня і акуратнасць горада. Навуковец у першых жа словах падзякаваў кіраўніцтву раёна і яго рупліўцам за гаспадарлівасць і клопат пра наш агульны дом. Як адзначыў дацэнт, гэтыя рысы ўвогуле ўласцівы ўсім беларусам – працавітай, адкрытай, дружалюбнай, стойкай і мужнай нацыі.

    Ганаровы госць дня інфармавання закцэнтаваў увагу прысутных на тым факце, што сёння за любымі эканамічнымі пераўтварэннямі стаяць людзі, і іх дабрабыт з’яўляецца ключавой мэтай гэтых пераўтварэнняў. М. С. Шчокін канстатаваў: быць грамадзянінам Беларусі – ганарова, пачэсна, але ў той жа час няпроста. Бо ў кантэксце сусветных падзей кожны з нас усведамляе сваю індывідуальную ролю і адказнасць у навейшай гісторыі. У нас няма запасаў прыроднага газу, нафты, золата. Затое ёсць галоўны і самы важны набытак – просты, памяркоўны, таленавіты ад прыроды народ…

    Кандыдат філасофскіх навук прапанаваў усім паразважаць яшчэ над адным пытаннем: у чым жа заключаецца веліч нацыянальнага лідара ў XXI стагоддзі і якая яго роля ў жыцці грамадства і асобнага чалавека? Лідар – гэта той, хто ведае, што трэба рабіць у любой сітуацыі. Сюды ўключаецца і эмацыянальнае ўздзеянне, паколькі лідар павінен натхняць, мабілізаваць, танізаваць і заахвочваць, весці за сабой людзей, карыстацца даверам, не баяцца рызыкаваць. І жыць дзеля іншых.

    Будучыня рыхтуецца стваральнай працай, кожны з нас удзельнічае ў фарміраванні дабрабыту – свайго і наступных пакаленняў. І наш нацыянальны лідар – ганаровы, упэўнены ў сабе чалавек – разумее, што людзей адказных, сумленных, сацыяльна актыўных, майстроў сваёй справы павінна станавіцца ўсё больш… М. С. Шчокін адзначыў і вялікую ролю органаў дзяржаўнага кіравання ў вырашэнні надзённых праблем простага чалавека, павышэнні ўзроўню жыцця насельніцтва.

    Сёння грамадства выходзіць на наступны этап развіцця. Кіраўнік навуковай установы падкрэсліў, што, па сутнасці, вядзецца палітыка, накіраваная на пошук і раскрыццё альтэрнатыўных магчымасцей і здольная стварыць новую якасць жыцця. Перад кожным раскрыта прастора для прадпрымальніцтва і ініцыятывы. А разам з ростам магчымасцей у геаметрычнай прагрэсіі расце і індывідуальная адказнасць за сучаснасць і будучыню. “Прыспеў час кожнаму спытаць у сябе: а што зрабіў я для паляпшэння ўласнага дабрабыту?” – эфектна завяршыў выступленне Мікалай Сяргеевіч.

    У той жа дзень кіраўнік Цэнтра палітычнай і эканамічнай сацыялогіі Інстытута сацыялогіі Нацыянальнай акадэміі навук наведаў і аддзел унутраных спраў райвыканкама. Мікалай Сяргеевіч уваходзіць у склад грамадскага савета Міністэрства ўнутраных спраў Беларусі, таму з поўным правам выступіў з лекцыяй і перад калектывам РАУС, акрэсліў некаторыя спецыфічныя моманты ў рабоце міліцыянераў, даў слушныя парады па далейшым павышэнні прэстыжу гэтай прафесіі і фарміраванні станоўчага іміджу ў насельніцтва. М. С. Шчокін з задавальненнем прывітаў начальніка РАУС – палкоўніка міліцыі Ігара Уладзіміравіча Шакуна – як аднаго з лепшых кіраўнікоў тэрытарыяльных аддзелаў УС усёй краіны. Таксама ганаровы госць выканаў пачэсную місію, уручыўшы пасведчанні і табельную зброю двум лейтэнантам міліцыі – оперупаўнаважанаму групы па наркакантролі і процідзеянні гандлю людзьмі Паўлу Рубянкову і оперупаўнаважанаму групы па барацьбе з эканамічнымі злачынствамі Мацвею Капусту. Завяршыў рытуал уступлення маладых афіцэраў у афіцэрскі сход старшыня ветэранскай арганізацыі Валожынскага РАУС Артур Гургілоевіч Махмудаў, які падзяліўся некаторымі напрацоўкамі велізарнага вопыту аператыўнай работы і па-бацькоўску мудра і цёпла пажадаў спецыялістам горда несці званне міліцыянера па жыцці, стаяць на варце Закона і дапамагаць знаходзіць праўду ўсім, хто яе шукае.

Сяргей САДОЎСКІ,

фота аўтара

Вадзіцель СГУ "Бабровічы" УП "Мінскаблгаз" Аляксандр ПРАТАСЕВІЧ з той катэгорыі людзей, якія імкнуцца любую справу выканаць бездакорна. Гэтак атрымалася і ў час сёлетняй уборачнай кампаніі, дзе малады чалавек быў задзейнічаны на адвозцы зерня ад камбайнаў. Па стане на 21 жніўня ён перавёз на велікагрузным "МАЗе" 1231 тону збожжа. Гэты вынік дазволіў Аляксандру выйсці ў лідары ўнутрыраённага маладзёжнага спаборніцтва. Павіншаваць перадавіка прыехалі ў гаспадарку старшыня раённага аб'яднання прафсаюзаў Вераніка ЗАГОРСКАЯ і першы сакратар райкама ГА "БРСМ" Наталля НЯМКЕВІЧ.

Фота Сяргея БОБРЫКА

Лета гэтага года для выпускніцы Івянецкай СШ Аліны ЗАЛАТАР, як і для ўсіх, хто скончыў школу, было насычана шматлікімі падзеямі і эмоцыямі: радасцю, хваляваннем, выбарам.

    У сваёй роднай адзінаццацігодцы яна была адной з самых прыгожых, здольных і мэтанакіраваных вучаніц выпускнога класа – з залатым медалём скончыла школу. Калі на раённым выпускным балі з рук старшыні раённага выканаўчага камітэта Мікалая Анатольевіча Астрэйкі атрымлівала заслужаную ўзнагароду, сэрца перапаўнялі прыемныя пачуцці, што ўсё было недарэмна, хоць вельмі напружана і клапотна.

    Аліна бліскуча здала тэсты. У прыватнасці, 98 балаў набрала па гісторыі Беларусі, 94 – па беларускай мове. Таму ўпэўнена падала дакументы ў Мінскі дзяржаўны лінгвістычны ўніверсітэт на спецыяльнасць перакладчыка-рэферэнта. Конкурс быў досыць вялікі: 5 чалавек на месца. Але ў яе ўсё атрымалася – Аліна Залатар стала студэнткай бюджэтнай формы навучання гэтай вышэйшай навучальнай установы.

    Наперадзе – новы віток жыцця: вялікі горад, вялікія надзеі, вялікае жыццё. Таму пажадаем, каб усё задуманае абавязкова спраўдзілася, як гэта адбылося сёлета.

Алена ЗАЛЕСКАЯ

Фота Сяргея БОБРЫКА